Gospel according to St. Luke 2, 1-20, from Lipovtsov’s translation of the New testament in Manchu.

*tere fonde afuguset kesar han hese wasimbufi. abkai fejergi boigon anggala be bodome dangse arabuha: geren irgen gebu alibure jalin meni meni harangga hoton de genehe: iosib. dabit han i enen ofi. inde tusuhe. beye jursu oho mariya be gaifi. inu gebu alibure jalin. galiliyeya goloi harangga nasaret hoton ci jurafi. iodeya goloi harangga. dabit han i betliyem gebungge hoton de genehe: ce tubade bisirede. mariya i dedure biya oho. uthai aji jui banjifi. managa de hūsifi. huju i dolo tebuhengge. cohome tatara boode sula giyalan be bahakū turgun: tubai ba na de ulha be tuwakiyara niyalma dobori idurame adun be tuwakiyaha bihe. gaitai abkai ejen i anggel abka ci tesei juleri ebunjihe. abkai ejen i ferguwecuke elden cembe fosoko be dahame. ce ambula gūwacihiyalafi berekbi. anggel ceni baru hendume. ume gelere. bi suwende. geren niyalma be urgunjebure amba urgun i baita be alanjiha: enenggi dabit han i hoton de suwembe aitubure ejen geristos banjiha. erei temgetu ojorongge. suwe genefi. managa de hūsibuha. huju i dolo deduhe huhuri jui be bahafi sabumbi sehede. holkonde abkai ejen be tukiyeceme. ten i dergi abka de bisire abkai ejen de maktacun. abkai fejergi de hūwaliyasun. geren niyalma de gosire kesi seme hendure ton akū abkai cooha ere anggel i sasa oho: tereci geren anggel abka de wesike manggi. ulha tuwakiyara niyalma ishunde hendume. betliyem hoton de genefi. abkai ejen i mende tacibuha tubade tucinjihe baita be tuwaki sefi. uthai ekšeme genefi. tubade bisire mariya. iosib. jai huju i dolo deduhe huhuri jui be bahafi sabuha. erebe sabufi. uthai geren niyalma de. ere huhuri jui be jorime cende donjibuha babe giyan giyan i alaha: ulha tuwakiyara niyalmai alaha be donijha geren i dolo ferguwehekūngge akū: mariya nememe ere gese gisun be mujilen de tebufi ejehe: ulha tuwakiyara niyalma. cende alaha songkoi gemu sabuha donjiha be dahame. abkai ejen be tukiyeme maktame amasi mariha:*